Акварель мастар дене у вашлиймаш

5 декабрьыште 16 шагатлан Национальный художественный галерейыште Российын калык художникше, Акварель живописьын мастерже Сергей Андриякин «Акварель, рисунок» выставкыже почылтын.

Йошкар-Олаште илыше-влак Сергей Николаевичын творчествыж дене 2007 ийыште палыме лийыныт. Тунам выставкыш шуко калык толын да чылан тауштен каеныт. Тиде гана сÿретче у творческий пашаже-влакым ончалаш темла. Паша-влакым ыштымаште шуко пачашан классике акварель техникым кучылтмо.

Выставкыште тÿрлö жаплаште ыштыме акварель да сÿрет-влак ончыкталтыт. Чылаже - 100 радына. Нунын коклаште чапланыше сÿрет-влак - «Старинные книги с синим бархатом» (1997), «Флокса-влак» йомак аршаш (1995), тыгак у паша-влак – «Зима в Суздальском кремле» (2013), «Каргополье. Погост Саунино» (2014). Экспозицийыш Крымысе да йотэлысе сÿрет-влак серий пура, тыгак Сергей Андриякин ондак ончыкталтдыме корнысо графике заметкыже-влакым ужаш лиеш.



С.Н. Андрияка 1958 ийыште Москошто шочын. Ачаже – Николай Иванович Андрияка (1905-1977), РФ-ын сулло сÿретчыже, Москосо В.И. Суриков лÿмеш художественный школышто тудым 1939 ыштыме годсек туныктен. Пытартыш ийлаште школын директоржо лийын. Сÿретчын аваже, Этолия Рудольфовна, йот йылмым туныктен. С.Н. Андрияка 1976 ийыште Москосо В.И. Суриков лÿмеш пеленсе художественный школым тунем пытарен. Москосо В.И. Суриков лÿмеш художественный институтын живопись факультетыштыже шинчымашым поген. 1982 ийыште «Станковая живопись» специальность дене дипломым сайын арален.

Сергей Николаевич Андрияка творческий пашажым ÿян чия, гуашь, темпера дене тÿҥалын. Мозаике, витраж, офорт, дене заниматлен, фарфорыш да эмальыш сÿретлен. Но эн йöратыме техникыже эре акварель живопись лийын. Сÿретче Брюловын, Саврасовын, Левитанын, Вребельын тÿҥалме пашаштым шуя. Тудо шуко пачашан классике акварель мастар-влакын йÿлаштым шке сымыктышыштыже арала да вияҥда.

Сÿретче чапланымашым налын, почетан лÿм-влак дене палемдалтын, Москосо акварель школым, Акварель да изящный сымыктыш академийым вуйлата. Но шкенжым эн ончыч сÿретчылан шотла. Икана Сергей Николаевич каласен: «Сымыктыш - тÿням ыштымын портретше. Ала лач тыште сÿретчын эн кугу пиалже - у образ-влакым чоҥымо дене эре кумылаҥеш. Илышыште кеч-кушко ит ончал - чылажат кагазыш возаш йодеш».

«Кугарня» газетын ответственный секретарьже Ирина Золотарева.

Служители театрального искусства Марий Эл сегодня отмечают профессиональный праздник - Marimedia.Ru Зампредседателя Правительства Марий Эл — министр культуры, печати и по делам национальностей Константин Иванов поздравил работников театра с их праздником, который отмечается сегодня.
Marimedia.Ru